一、普通人
汝是普普通通的一個人
汝的面腔，好親像一面壁仝款
空空無半項。
有時吊著一本裂破的臘日
有時爬著幾隻善蟲仔
遮呢仔歹看相！
遮呢仔枵飢失頓！
汝真是普普通通的一個人
講的話，好親像一堀死水
濁濁袂流。
有時浮出一寡散茫茫的水影
有時噴出一寡垃穇里濁的水花
嶄然仔無內容！
粗聲重喉擱逆耳！
二、地下人
汝干凋跨了一步
著行入家己的烏影內
汝的烏影佇地面上
汝已經行入去地下
佇地下活動
烏影，勘著汝
汝佇地下行著千里的路途
才踏上前方的光線內
汝毋敢褪開家己面對光線
但是光線有一雙手
將汝褪去衫褲
光線，有光線的強迫佮野蠻
這時，汝想著地下
烏暗的目睭，澹濕的喙唇
啼哭的耳仔，流血的頭鬃
造成了無成人樣的面目
佇光線的照射下
烏影，又閣勘落來
三、空殼人
汝是去乎挖走啥？
汝親像一粒空的殼
掛佇樹枝尾
風呼一下就過去
汝搖
汝墜
汝的人生終其尾是破甲碎糊糊！
現此時汝偆的是啥？
汝變成一聲怨歎的氣
佇風中的敵人
微微仔有聽著
汝飄
汝幌
汝當咧向敵人的耳仔
發出哀怨的抗議聲！
四、揹十字架的人
汝被牽咧
因為汝的目睭青瞑囉
連汝的手嘛青瞑囉
手摸袂著家己的身軀
佇咧迷失
佇咧慌狂
一雙手親像一對風雨中的翅！
汝被拖椆的
因為汝的跤斷去囉
目屎毋閣流出來，身軀是凋硞硞的土地
佇咧迫紃
佇咧陷落
製造一股目屎的水泉！
汝被唱作歌
因為汝的喘氣煞停止囉
連汝的嚨喉攏踼椆的囉
嚨喉是一條無底深坑的孔道
彼種喝咻
彼種哀哮
佇下底一擺閣一擺咧拼命響叫！
五、爬佇峘頂的人
汝已經徛卡有夠峘囉
城市佇汝的眼內
歸座島佇汝的眼內
全世界佇汝的眼內
汝亦想欲徛閣卡峘一點
真好，真好，汝會駛峘入雲霄
將天堂嘛收來囥佇汝的眼內
汝已經徛袂穩囉
城市蹁蹁倒倒
歸座島蹁蹁倒倒
全世界蹁蹁倒倒
汝亦強欲跋落來
真好，真好，汝會凍向下跤跳
對天堂跋落去地獄內
汝的目睭
落落佇阮的手中
汝的目屎
對阮的指頭仔縫洩出來
真好，真好，汝乎阮美麗的一幕戲
全站熱搜
留言列表
